Qitiusumik Allaffeqarfimmi isumannaallisaanermut suleqatigiinnermullu ataatsimiititaliaq

Qitiusumik Allaffeqarfimmi sumiluunniit suleqatigiinnermik pilersitsinissaq siunertaralugu suleqatigiinnerup ataqatigiissuunissaa qulakkeerniarlugu aamma aqutsisut sulisullu akornanni suleqatigiinnerisa sapinngisamik pitsaanerpaanissaa qulakkeerniarlugu Isumannaallisaanermut ataatsimiititaliami (SU) aamma Peqatigiinnissamut Ataatsimiititaliarsuarmi (HSU) isumannaallisaanermut sinniisutut suleqatigiinnermullu ataatsimiititaliani sinniisutut suliassanik isumaginninneq 1. januar 2021-mi ataatsimoortinneqarput.

Isumannaallisaanermut ataatsimiititaliap aamma Peqatigiinnissamut Ataatsimiititaliarsuup kattunneqarnermikkut maannakkumiit Isumannaallisaanermut suleqatigiinnermullu ataatsimiititaliamik naalisarlugulu HSSU-mik taaguuteqalissapput.

Isumannaallisaanermut sinniisut suliffimmilu suleqatigiinnermut ataatsimiititaliamut sinniisut kattunneqarnermikkut maannakkumiit Suliffimmi Isumannaallisaanermut suleqatigiinnermullu ataatsimiititaliamik naalisarlugulu LSSU-mik taaguuteqalissapput.

Isumannaallisaanermut suleqatigiinnermullu aaqqisuussamiissapput:

Isumannaallisaanermut suleqatigiinnermullu ataatsimiititaliaq pingaarneq (HSSU)
Isumannaallisaanermut suliffeqarnermullu ataatsimiititaliami (HSSU-mi) pissutsinik tamanik Naalakkersuisut aqutsineranni nalinginnaasumik sulinermut sulisoqarnermullu tunngasunik, assersuutigalugu sulinermut pissutsinut, sulisoqarnermut politikkimut, pisariillisaanermik naleqqussaanermillu suliniutinut annerusunut, suliffimmik nalilersuinermut (APV), suliffiup avatangiisaanut isumannaallisaanermullu tunngasunik paasissutissiissutigiittoqartarpoq eqqartuisoqartarlunilu.

Sulisut sinniisaat sisamat aqutsisullu sinniisaat pingasut kiisalu Isumannaallisaanermut ataatsimiititaliaq HSSU-miipput, matumani Naalakkersuisut Siulittaasuata Naalakkersuisoqarfiani naalakkersuisoqarfimmi pisortaq siulittaasuuvoq.
Isumannaallisaanermut ataatsimiititaliaq marlunnik aqutsisunut sinniisoqarput marlunnillu sulisunut sinniisoqarlutik. HSSU-mi siulittaasoq Isumannaallisaanermut ataatsimiititaliami aqutsisut sinniisissaannik taasissaaq, taakkunani marlunni ataaseq ataatsimiititaliamut siulittaasuussalluni. Isumannaallisaanermut ataatsimiititaliami siulittaasup isumannaallisaanermullu sinniisut piginnaatitsissutit, Kalaallit Nunaanni suliffimmi avatangiisit pillugit inatsit naapertorlugu tunniunneqartut isumagisassavaat.

HSSU minnerpaamik ukiumut sisamariarlutik ataatsimiittassapput.

HSSU LSSU-mi ilaasortanut tamanut isumannaallisaaneq suleqatigiinnerlu pillugit ukiut tamaasa isumasioqatigiissitsisassaaq. HSSU-mut isumannaallisaanermut sinniisunik sulisullu sinniisaannik taasinerup saniatigut ullormut oqaluuserisassat qitiusumik allaffeqarfimmi sulisunut suliffimmilu pissutsinut tunngasunik kiisalu suliffimmi avatangiisinut tunngasunik ataatsimut eqqartugassanik imaqassaaq.

Suliffimmi isumannaallisaanermut suleqatigiinnermullu ataatsimiititaliaq (LSSU)
LSSU-mi pissutsinik tamanik naalakkersuisoqarfimmi, aqutsisoqarfimmi ingerlatsiveqarfimmiluunniit sulinermut sulisoqarnermullu tunngasunik, assersuutigalugu sulinermut pissutsinik, sulisoqarnermut pissutsinik, teknikkinik nutaanik pilersitsinernik pioreersunilluunniit allannguinernik, aningaasaqarnermut tunngasunik, sulisoqarnermut politikkit HSSU-mit tunniunneqartut atuutilersitsinernik, suliffimmik nalilersuinermut (APV), suliffiup avatangiisaanut isumannaallisaanermullu tunngasunik paasissutissiissutigiittoqartarpoq eqqartuisoqartarlunilu.

LSSU pingasuniit arfinilinnut aqutsisunut sulisunullu sinniisoqarpoq, taakkunannga minnerpaamik ataaseq aqutsisunut sinniisuulluni kiisalu isumannaallisaanermut ataatsimiititaliami ilaasortat.

Isumannaallisaanermut suleqatigiinnermullu ataatsimiititaliaq pillugu kaajallaasitaq