Nutserisoqarfik

Namminersorlutik Oqartussat nutserisoqarfiat aaqqissuussaanikkut Aningaasaqarnermut Sulisoqarnermullu Aqutsisoqarfimmi inissitaavoq. Nutserisoqarfiup qitiusumik allaffeqarfik tamakkerlugu nutsigassanik oqaluttaaffissanillu sullitaraa, kisianni pisortat suliffeqarfiutaat suliffeqarfiillu ataaniittut pinnagit.

Nutserisoqarfiup sullissineri pisariitsuussapput paasiuminartuullutillu. Allakkanik nutserinissaq toqqaannartumillu oqaluttaanissaq neqeroorutigineqartarput.

Allakkanik nutserinerit

Nutserisoqarfiup pingaartumik kalaallit oqaasiiniit danskit oqaasiinut paarlattuanillu nutsigassat neqeroorutigai. Tamakku saniatigut allamiut oqaasiinit taakkununngalu nutserinerit neqeroorutaapput. Nutserisoqarfiup Wordimi, PowerPointimi, txt-mi taamatullu Excelimi allakkat nutsigassat tigoorartarpai.

PDF-filit tiguneqarsinnaapput, taamaattoq filit tamakku aallaqqaammut iluserisaminnut utertinneqartussaapput saniatigut piffissartornartumik taamaammallu piffissaliussat malinneqarnissaat naatsorsuutigineqarsinnaanngilaq.

Oqaatsinik atuinermut tunngatillugu Nutserisoqarfik tallimanik oqariartuuteqarpoq:

  1. Oqaaseqatigiit oqaaseqatigiinnut ikkussat pinngitsoortakkit. Danskit kalaallillu assigiinngitsunik oqaaseqatigiiliortaaseqarnerata kingunerisarpaa danskisuuani oqaaseqatigiit oqaaseqatigiinnut ikkussat nutseruminaattarnerat.
  2. Uniffinnut taarsiullugu naggatit atortakkit. Oqaaseqatigiit takivallaartittarnagit.
  3. Siunnerfeqannginnermut taarsiullugu siunnerfilinnik allattarit.
  4. Allamiut oqaasiinik pisariaqanngitsumik atuisarneq eqqarsaatigeqqaaruk.
  5. Oqaatsinik nammineq isummersugassanik, oqariartaatsinik paaseqatigiissutigisariaqartunilluunniit atuinaveersaarit.

Taamaammat pingaaruteqarpoq Nutserisoqarfimmut suliassanik nassiussigaangavit atortussanik piumasaqaatit malittarnissaat Nutserisoqarfiullu tunniussinissamut killiliussaasa sissuertarnissaat. Atortussanik piumasaqaatit piffissanillu killiliinerit Nutserisoqarfiup Sullissinermut Najoqqutassaani atuarneqarsinnaapput - UANI

Pitsaassutsimik qulakkeerineq

Nutserisoqarfiup nammineq nutsikkani tunaartarisassat erseqqinnerusut malillugit pitsaassusilersortarpai tamannalu suli piffissartornarnerulersitsisarluni, taamaalillunilu nutserinermut sivitsorsaataasarluni. Nutserisoqarfiup nutsikkat Nutserisoqarfik avaqqullugu suliakkiissutigineqarsimasut pitsaassusissaat isumannaartanngilaa.

Toqqaannartumik oqaluttaasarneq

Allakkanik nutserinerit saniatigut Nutserisoqarfiup toqqaannartumik oqaluttaasarneq pingaartumik kalaallit oqaasiiniit danskit oqaasiinut paarlattuanillu neqeroorutigaa. Tuluttuumut tuluttuumiillu toqqaannartumik oqaluttaasarneq annikikkaluamik neqeroorutigineqarsinnaavoq.
Toqqaannartumik oqaluttaasarneq Nutserisoqarfimmi pilersaarusioqqissaartariaqartarpoq, tassami nukissat allakkatigut nutsigassaniit toqqaannartumik oqaluttaanernut atortariaqalersaratsigit. Taamaammat toqqaannartumik oqalutseqarnissamik pisariaqartitatit piffissarissaartitsillutit nalunaarutigisassavatit. Toqqaannartumik oqalutsissamik inniminniinermut atatillugu piumasaqaatit piffissaliussallu Sullisinermut najoqqutassami atuarneqarsinnaapput.
Toqqaannartumik oqalutseqarneq illuatungeriit oqaatsinik assigiinngitsunik marlunnik oqaluttut akornanni iluatsittumik attaveqaqatigiinnermut atorneqartarpoq. Taamaakkaluartoq aammattaaq ingerlaasiuvoq kukkusumik nutseriffiusinnaasoq, paatsoorfiusinnaasoq attaveqaqatigiinnerlu taamaattoq oqimaatsutut misinnarsinnaavoq.
Arlalipaaloqarpoq toqqaannartumik oqalutsimik atuisup iliuuserisinnaasaanik, pissutsit pitsaanerpaamik ingerlasinnaaqqullugit.
Toqqaannartumik oqalutsimik atuisumut najoqqutassat pingasut:

  1. Oqalutsigisassat sammisamut piareersaruk - sapinngisamik sukumiinerpaamik. Piareersarluarsimanerugaanni oqaluttaaneq pitsaanerusarpoq. Taamaammat toqqaannartumik oqalutseqarnissamut atortussat piffissaalluartillugu nassiutikkit, ajornanngippat taamaaliornissaq sapaatit akunnerannik ataatsimik sioqqullugu.
  2. Sukkaatsumik erseqqissumillu oqalugit.
  3. Oqalunninni unillattaartarit paasiuminaatsumillu oqalunnaveersaarlutit.

Toqqaannartumik oqalutsissamik inniminniisarneq akiliisarnerlu
Toqqaannartumik oqalutsissamik inniminniinermut atatillugu inniminniinermut immersuiffissaq atorneqassaaq UANIITTOQ.
Immikkoortortaqarfiup toqqaannartumik oqalutsissamik inniminniisup oqalutsip oqaluttaanersiutisiassai taamaallaat akilissavai, tassa Sullissinermut najoqqutassami piffissaliussat taaneqartut iluanni inniminniisoqarsimappat.
Piffissaliussat eqqortinneqanngippata immikkoortortaqarfiup toqqaannartumik oqalutsissamik inniminniisup aammattaaq oqalutsip nalinginnaasumik aningaasarsiai oqaluttaanermut tapisiat saniatigut akilissavai.
Angalasoqartillugu angalanermut ineqarnermullu aningaasartuutit taamatuttaaq ullormusiat allallu immikkoortortaqarfiup toqqaannartumik oqalutsissamik inniminniisup akilissavai.

Nassiussivissat attaveqarfissallu
Suliassat tamarmik soorlu allakkatigut nutsigassat kiisalu toqqaannartumik oqalutseqarnissamik kissaatigisat uunga nassiunneqartassapput: Nutsigassat@nanoq.gl pingaartumik toqqaannartumik oqalutsissarsiornermitamanna sammisat inissisimaffianni allaqquneqarpoq.

Apeqqutissaqartoqartillugu, nalornisoqartillugu nalunaarutiginnittussaqartillugulu uku attaveqarfigineqarsinnaapput:

Ole Birch, olbi@nanoq.gl, lokal 5801

Arnajaraq Tobiassen, arn@nanoq.gl, lokal 5816