Suliffimmik Nalilersuineq

APV tassaavoq ingerlatsineq inatsisitigut pisussaaffiusoq, tarnikkut timikkullu suliffimmi isumannaallisaanikkut ajornartorsiutaasunut atorneqartussaq, pingaarnersiuisoq aamma aaqqiisussaq, taamaalilluni sulisunut tamanut suliffimmi isumannaallisaaneq pitsaasoq pilersinneqarlunilu nutarterneqartartussaq. APV-mik ingerlatsisoqarnissaanut aqutsisut akisussaapput, 2009-miillu tamatuma allakkatigut ingerlanneqarnissaa inatsisitigut piumasaqaataalersimalluni. APV imatut imaqassaaq:

  • Suliffeqarfimmi isumannaallisaanikkut pissutsit paasineqarneri erseqqissarneqarnerilu
  • Suliffeqarfiup isumannaallisaanikkut ajornartorsiutaanik allaaserinninneq nalilersuinerlu
  • Suliffeqarfiup isumannaallisaanikkut ajornartorsiutaanik aaqqiinissamut iliuusissani pilersaarummi pingaarnersiuineq saqqummiussinerlu
  • Iliuusissanik pilersaarummi malitseqartitsinissamut najoqqutassat.

OQALUTTUASSARTAA: 2011-mi aamma 2012-mi Qullersaqarfimmi APV suliffimmi atugassarititaasut pillugit misissuinerit ilagaa.

2011-mi immikkut pingaartillugu APV pillugu nalunaarusiortoqarpoq, immikkoortortani unamminartut paasineqarnissaannut, tulleriiaarnissaannut aaqqiiffiginissaannullu aallaaviatigut isumannaallisaasoqatigiinnit ataasiakkaanit atorneqarsinnaasoq.

Isumannaallisaanermut ataatsimiititaliaq 2012-mi aalajangerpoq APV-mik suliarinneqqinnissami immikkoortortani ataasiakkaani suliffimmi atugassarititaasut pillugit nalunaarusiat aallaaviussasut, inernerimi tamarmik tassani pissarsiarineqarsinnaammata.

APV-mi apeqqutit HRU-mit suliarineqarput isumannaallisaanermilu aaqqissuussineq tamarmi ilaatinneqarluni. APV naammassineqarpat inernerit qanoq tulleriiaarneqassanersut suliarineqassanersullu Isumannaallisaasoqatigiit aalajangertussaassavaat. Isumannaallisaasoqatigiit suliassanik tulleriiaarinermi apeqqutit makku isumassarsiorfigisinnaavaat

  • Ajornartorsiut inatsimmik unioqqutitsinermik kinguneqassava?
  • Ajornartorsiutip suliarinissaanut kajumissuseqartoqarpa?
  • Ajornartorsiut sukkasuumik pisariitsumillu aaqqinneqarsinnaava?
  • Piumasaqaatissanut takkuttussanut naleqqiullugu suliffik siunissamut isumannaassavarput?
  • Ajornartorsiut arlalissuarnut attuumassuteqarpa?
  • Aaqqiissutip naammassiniarnera sivisua – annertuumik suliniartoqassava akisuallaarpalu?
  • Ajornartorsiutip aaqqinnissaa inummut ataatsimut/immikkoortortamut assut pingaaruteqarpa?
  • Ajornartorsiut suliffimmi ajornartorsiutaasutut akuerineqareerpa?

Ajornartorsiutit paasineqarpata tulleriiaarneqareerpatalu aaqqiissutissarsisoqassaaq. Naleqqunnerpaamik aaqqiissuteqarsinnaajumalluni aaqqiissutissatut periarfissani assigiinngitsuni iluaqutissat akornutissallu eqqarsaatigisariaqarpasi periarfissallu, kingunissai aningaasaqarnerlu ataatsimut paasisaqarfigalugit. Ilaannikkut nukissaaleqineq pissutigalugu pitsaanerpaamik aaqqiissuteqarnissaq ajornartarpoq, taamaalillusilu nutaanik aaqqiissutissarsiniartariaqartarluni immaqalu isumasioqatigiittariaqarlusi.

APV minnerpaamik ukiut pingajussaanni nalilersoqqinneqassaaq, imaluunniit sulinermi, suleriaatsini imaluunniit sulinermi periutsini suliffimmi isumannaallisaanermut pingaaruteqartunik allannguisoqarlugu

APV pillugu nalunaarusiat

Namminersorlutik Oqartussat sinnerlugu Suliffimmik Nalilersuineq pillugu nalunaarusiaq 2011